做個「剛剛好」的穩定數學5** (前言)

如果你係本身點考都難你唔倒嘅話，呢個series 對你來說係無咩用架啦。呢個series嘅對象係唔一定係好叻但喺考試範圍內溫得剛剛好，唔會太多亦一定學足嘅人睇嘅。

好多人而家去考DSE好似去咗搵打機攻略咁，討論區、FB 不乏一啲「我而家底3，想攞5/5*，點做？」、「我底子算好，想追星，補邊個？」嘅問題。但係奈何網上嘅人質素參差、目標又唔同，所以好多時一係就跟風講邊個邊個好，咁樣咁樣做就得。要具體知道每一關點過，又無wiki 幫你手。今日就從一個中六準考生嘅角度講點樣穩奪5**。

首先你要知道內容考嘅係中一至中六教過嘅所有課題，考評局搵人出卷，分兩份卷，卷一 105分，佔全科65%，時間2小時15分鐘；卷二45條MC，佔全科35%，時間1小時15分鐘。地點而家係未知邊間中學。可以帶幾部計數機、繪圖用具、正常文具入場。

所謂遊戲規則會影響人嘅行為。一般同學、家長、老師或補習老師只放眼於你識定唔識果條數，而唔係整體去train 你每一個細節去迎合DSE，對於一生人一次嘅考試(我希望係一次啦XD)，仲話要攞5**，實在唔夠專業。舉個例子，如果你咩都識晒，但你係做一個鐘嘢就會分心/攰嘅人，你係絕對有機會攞唔倒5**架，因為卷一你做咗一個鐘之後其餘時間嘅result 就會變得好random。所以呢個<<做個「剛剛好」的穩定數學5**>> series 會著眼於點樣train 你喺內容、技巧、時間分配方面做到剛剛好。